د احمدشاه ابدالي لوړو زده کړو مؤسسې د غونډو په تالار کې په جرمني هېواد کې د مېشت افغان کادر او په نږدې وختونو کې د لیونارډو شوابیر اېوارډ ګټونکي پوهندوی ډاکټر بسم الله شېوامل لخوا د Vacuum Theraphy in Infected Wounds تر عنوان لاندې علمي سیمنار ارایه شو.
په دغه علمي سیمنار کې د یادې مؤسسې بنسټګر پوهاند دوکتور بادشاه زار عبدالي، د مؤسسې رئیس پوهاند ګل محمد جنت زي، علمي معاون استاد محمد حنیف معاذ، د ډاکټرانو شورا رئیس ډاکټر عبدالحکیم، د مؤسسې استادانو، محصلینو او د خصوصي او دولتي نهادونو ګڼ شمېر استازو ګډون کړی و.
د سیمنار تر څنګ د احمدشاه ابدالي لوړو زده کړو مؤسسې اداري غړو او محصلینو د ډاکټر شېوامل د ستاینې په موخه لوړ مراسم هم نیولي وو.
په پیل کې د مؤسسې بنسټګر پوهاند عبدالي ډاکټر بسم الله شیوامل ته ښه راغلاست ووایه او زیاته یې کړه، چې ابدالي د لوړو زده کړو مؤسسې غړي او محصلین د افغانستان د وتلي کادر ډاکټر شېوامل شتون او قدردانۍ د مؤسسې او په ټوله کژ د خوست ویاړ بولي.
د خوست د ډاکټرانو شورا رئیس ډاکټر عبدالحکیم د ډاکټر بسم الله شېوامل هڅې وستایلې او د درناوي په موخه یې نوموړي ته د خوست د ډاکټرانو د شورا په استازیتوب یو ستاینلیک هم ډالۍ کړ.
د غونډې او سیمنار په پای کې د احمدشاه ابدالي لوړو زده کړو مؤسسې د ادارې لخوا استاد بسم الله شېوامل ته یو اېوارډ هم ډالۍ شو.
د نشراتو مدیریت